کوپ 30 بیلیم: پاکستان کا نیا مؤقف اور موسمیاتی انصاف

کوالالمپور کا تاریخی اعلان.الفاظ سے عمل تک کا فاصلہ
کوالالمپور میں ہونے والی بین الاقوامی ماحولیاتی کانفرنس میں انسان اور زمین کے درمیان “نئے معاہدے” کا اعلان ایک تاریخی لمحہ کے طور پر پیش کیا گیا۔ دنیا بھر کے ماہرینِ ماحولیات، پالیسی ساز، سول سوسائٹی کے نمائندگان اور نوجوان لیڈرز کی شرکت نے اجلاس کی اہمیت کو بڑھا دیا، لیکن سوال یہ ہے کہ کیا یہ وعدے صرف الفاظ تک محدود رہیں گے یا حقیقی تبدیلی کی بنیاد رکھیں گے؟
گزشتہ کئی دہائیوں میں ہم نے اسی طرح کے بین الاقوامی اجلاس، وعدے اور معاہدے دیکھے ہیں، جن میں شجرکاری، پائیدار توانائی، اور ماحولیاتی تحفظ کو یقینی بنانے کے عزم کے دعوے کیے گئے، مگر عملی اقدامات اکثر سست یا نامکمل رہ گئے۔ کوالالمپور کا اعلان بھی اسی پس منظر میں سامنے آیا ہے۔ تقریب میں سولر انرجی، گرین ٹیکنالوجی اور ماحول دوست پالیسیوں پر زور دیا گیا، لیکن عملی منصوبہ بندی کے بغیر یہ تمام حوصلہ افزا تقریریں محض کاغذی دعوے رہیں گی۔
کوالالمپور کی کانفرنس اس بات کا کھلا ثبوت ہے کہ ماحولیاتی بحران پہلے سے کہیں زیادہ سنگین ہو چکا ہے۔ صنعتی ترقی اور معاشی مفادات کی دوڑ میں زمین کی صحت اکثر ثانوی حیثیت اختیار کر جاتی ہے۔ مگر یہی وہ حقیقت ہے جس کا سامنا ہمیں آج کرنا ہے: اگر انسانی ترقی زمین کے توازن کو نقصان پہنچاتی رہی، تو آنے والی نسلیں اس کی بھاری قیمت ادا کریں گی۔
نوجوان لیڈرز اور سول سوسائٹی کی شرکت امید کی ایک کرن ضرور ہے، مگر حقیقی امتحان تب ہوگا جب عالمی سطح پر وعدے عملی اقدامات میں تبدیل ہوں گے۔ کیا ممالک اپنے اقتصادی اور صنعتی ماڈلز میں اصلاح کریں گے؟ کیا کلین انرجی کو ترجیح دی جائے گی؟ یا یہ تاریخی اعلان بھی محض عالمی میڈیا کی ایک دلچسپ خبر بن کر رہ جائے گا؟
کوالالمپور نے دنیا کو پیغام دیا ہے کہ زمین کے ساتھ تعلقات کو نظر انداز نہیں کیا جا سکتا۔ لیکن تبدیلی کے لیے نہ صرف عزم، بلکہ سنجیدہ، فوری اور شفاف اقدامات کی ضرورت ہے۔ ورنہ یہ “تاریخی قدم” بھی وقت کی ریت میں دھنس جانے والے خوبصورت الفاظ ہی رہ جائیں گے۔