شازیہ عدنان
سیپانگرانی کے طریقہ کار کو ڈیجیٹل بنانے کے لیے آن لائن پورٹل متعارف کرانے کا ارادہ رکھتی ہے،عمران صابر
پاکستان کی معیشت میں سب سے زیادہ حصہ ڈالنے والے ٹیکسٹائل اور چمڑے کے شعبے بین الاقوامی مارکیٹ میں مسابقتی رہنے کے لیے بین الاقوامی ماحولیاتی معیارات کی تعمیل کرنے کی کوشش کر رہے ہیں۔” یہ بات مقررین نے جمعرات کو کراچی کے ایک مقامی ہوٹل میں ڈبلیو ڈبلیو ایف پاکستان کے انٹرنیشنل لیبر اینڈ انوائرمنٹل اسٹینڈرڈز ایپلی کیشن ان پاکستان کے(آئی ایل ای ایس) ایس ایم ایز پروجیکٹ کے تحت منعقدہ میڈیا بریفنگ سیشن کے دوران بتائی۔ یہ 8 سالہ منصوبہ (2017-2024) یورپی یونین (ای یو) کے تعاون سے کراچی، لاہور، فیصل آباد، سیالکوٹ، حب اور کے پی کے کے صنعتی علاقوں میں لاگو کیا گیا ہے۔ اس منصوبے کا مقصد پاکستان میں سرکاری اور نجی شعبوں کے ذریعے بین الاقوامی لیبر اور ماحولیاتی معیارات کے نفاذ اور تعمیل میں معاونت کرنا ہے۔
پبلک سیکٹر کے اداروں اور کاروباری اداروں کی تربیت اور صلاحیتوں کو بڑھانے کے لیے، اس پروجیکٹ نے پاکستان بھر کے مختلف شہروں میں 62 سے زیادہ ورکشاپس کا انعقاد کیا۔ ان ورکشاپس کا مقصد کثیرالطرفہ ماحولیاتی معاہدوں، پائیدار ترقی کے اہداف اور بین الاقوامی ماحولیاتی قوانین اور معیارات کے لیے رپورٹنگ کے طریقہ کار کو بہتر بنانا تھا۔ مزید یہ کہ اس پروجیکٹ نے ٹیکسٹائل اور چمڑے کے شعبوں میں وسائل کے تحفظ پر چھ دستاویزی فلمیں بھی تیار کیں۔ اس منصوبے نے سندھ انوائرمینٹل پروٹیکشن ایجنسی سیپاکے لیے کلینر پروڈکشن پالیسی کا مسودہ تیار کرنے میں بھی مدد کی۔
اس موقع پر سیپا کے ڈائریکٹر عمران صابر نے کہا کہ ایجنسی سندھ کی ٹیکسٹائل اور چمڑے کی صنعتوں میں ماحولیاتی تعمیل کی نگرانی کر رہی ہے۔ ڈبلیو ڈبلیو ایف پاکستان کے تعاون سے ایجنسی صوبے میں ماحولیاتی نگرانی اور تشخیص کے طریقہ کار کو ڈیجیٹل بنانے کے لیے آن لائن پورٹل متعارف کرانے کا ارادہ رکھتی ہے۔ انہوں نے کہا کہ یہ پہلی بار ہے کہ ماحولیاتی نگرانی کے اعداد و شمار کو ڈیجیٹائز کرنے کی پہل کی گئی۔ مزید برآں، انہوں نے کہا کہ ماحولیاتی انحطاط پر توجہ دی جانی چاہیے کیونکہ یہ موسمیاتی تبدیلی اور ملک کو ماحولیاتی چیلنجز کا باعث بنتی ہے۔ انہوں نے مزید کہا کہ ”ہم ان اقدامات کی حمایت کے لیے پرعزم ہیں جو ماحول دوست ہوں اور پاکستان میں پائیدار ترقی کو فروغ دیں ”۔
میڈیا کو بریفنگ دیتے ہوئے مہک سکندر، کوآرڈینیٹر ”فریش واٹر پروگرام”، ڈبلیو ڈبلیو ایف پاکستان نے کہا کہ پاکستان کے ٹیکسٹائل اور چمڑے کے شعبے پاکستان میں سب سے زیادہ برآمدات کمانے والے شعبے ہیں۔ تاہم، ان شعبوں کو تعمیل کے مسائل، خام مال کی دستیابی اور بین الاقوامی مارکیٹ میں مسابقت کی وجہ سے سنگین کاروباری چیلنجوں کا سامنا ہے۔ انہوں نے بتایا کہ اس منصوبے کے ذریعے پاکستان میں ماحولیاتی قوانین اور معیارات کو مؤثر طریقے سے نافذ کرنے کے لیے متعلقہ محکموں کی استعداد کار میں اضافہ کیا گیا ہے۔ اس منصوبے کا مقصد ٹیکسٹائل اور چمڑے کے شعبوں میں وسائل کو موثر اور صاف ستھرے پیداواری طریقوں کو بھی فروغ دینا تھا۔ مہک سکندر نے مزید کہا کہ آئی ایل ای ایس پروجیکٹ نے 50 سے زیادہ چھوٹے اور درمیانے درجے کے کاروباری اداروں (ایس ایم ایز) کو ماحولیاتی انتظام کے سمارٹ طریقوں کو اپنانے میں مدد فراہم کی جس سے سالانہ 1.54 ملین کیوبک میٹر پانی اور 130 ملین کلو واٹ گھنٹے توانائی، 37,462 ٹن کیمیکلز کو بچانے اور 37,483 ٹن کاربن کے اخراج کو ختم کرنے میں مدد ملی۔ ان اقدامات کے نتیجے میں تقریباً 530 ملین روپے سالانہ کی بچت ہوئی۔
عرفان انصاری، جنرل منیجر سسٹین ایبلٹی اینڈ یوٹیلٹیز، الرحیم ٹیکسٹائل انڈسٹریز نے بتایا کہ پاکستان میں صنعتوں کی پائیدار ترقی کے لیے پانی کو محفوظ کرنا، کاربن کو 6 فیصد کم کرنا اور گندے پانی کے علاج کو یقینی بنانا ضروری ہے۔ انہوں نے کہا کہ ٹیکسٹائل کی صنعتیں پائیدار پیداوار کو فروغ دیں اور ذمہ دارانہ انتظام اور قدرتی وسائل کے استعمال کو یقینی بنائیں۔ انہوں نے مزید کہا کہ ان کے ٹیکسٹائل برانڈ نے پانی کی کھپت میں 40 فیصد کمی کی ہے اور گندے پانی کی موثر ری سائیکلنگ کے ذریعے پانی کی وصولی میں 50 فیصد اضافہ کیا ہے۔ انہوں نے ایسے اقدامات کرنے کی ضرورت پر زور دیا جو قدرتی وسائل کے تحفظ اور پائیدار پیداوار کے فروغ میں معاون ثابت ہوں
