اسلاام آباد، 27 مئی 2025 (فرحین نمائندہ) ملک بھر میں گرمی کی شدید لہر جاری ہے جبکہ بعض بالائی علاقوں میں بارش اور ژالہ باری کا امکان ظاہر کیا گیا ہے۔
محکمہ موسمیات کے مطابق منگل کی رات کشمیر، گلگت بلتستان، خیبرپختونخوا، اسلام آباد، پنجاب اور شمال مشرقی و جنوبی بلوچستان میں مطلع ابر آلود رہنے کے علاوہ آندھی اور گرج چمک کے ساتھ بارش کی توقع ہے، جبکہ چند مقامات پر موسلادھار بارش اور ژالہ باری بھی ہو سکتی ہے۔
بدھ کے روز ملک کے زیادہ تر علاقوں میں موسم گرم اور خشک رہے گا۔ تاہم، کشمیر، گلگت بلتستان اور بالائی خیبرپختونخوا میں جزوی طور پر ابر آلود موسم کے ساتھ آندھی اور گرج چمک کے ساتھ بارش کی توقع ظاہر کی گئی ہے۔
اسلام آباد میں دن کے وقت موسم گرم جبکہ شام اور رات میں جزوی ابر آلود رہنے کی پیش گوئی کی گئی ہے۔
خیبرپختونخوا کے بیشتر اضلاع میں موسم گرم اور خشک رہے گا، تاہم مانسہرہ، کوہستان، ایبٹ آباد، ہری پور، دیر، سوات، مالاکنڈ اور کرم کے علاقوں میں بارش کا امکان ہے۔
پنجاب میں بھی گرمی کی شدت برقرار رہے گی، البتہ مری، گلیات اور ڈیرہ غازی خان کے گردونواح میں دوپہر کے بعد تیز ہواؤں اور بارش کی پیشگوئی ہے۔
سندھ میں شدید گرمی کا سلسلہ جاری رہے گا۔ ساحلی علاقوں میں دوپہر کے بعد تیز ہوائیں چلنے کا امکان ہے جبکہ بالائی علاقوں میں جزوی ابر آلود موسم متوقع ہے۔
بلوچستان کے بیشتر اضلاع میں بھی گرم اور خشک موسم رہے گا، تاہم شمال مشرقی علاقوں میں مطلع جزوی ابر آلود رہنے کا امکان ظاہر کیا گیا ہے۔
گزشتہ 24 گھنٹوں کے دوران ملک کے بیشتر علاقوں میں شدید گرمی رہی، تاہم اسلام آباد، گلگت بلتستان، کشمیر اور خیبرپختونخوا کے بعض علاقوں میں گرج چمک کے ساتھ بارش ریکارڈ کی گئی۔
سب سے زیادہ بارش مالم جبہ میں 26 ملی میٹر، پشاور ایئرپورٹ پر 23 ملی میٹر، بالاکوٹ میں 18 ملی میٹر جبکہ اسلام آباد ایئرپورٹ پر 9 ملی میٹر ریکارڈ کی گئی۔
آج کے ریکارڈ کیے گئے زیادہ سے زیادہ درجہ حرارت:
جیکب آباد میں سب سے زیادہ 49 ڈگری سینٹی گریڈ، دادو میں 48 جبکہ شہید بینظیرآباد، سکرنڈ اور موہنجوداڑو میں 47 ڈگری سینٹی گریڈ ریکارڈ کیا گیا۔
محکمہ موسمیات نے شہریوں کو ہدایت کی ہے کہ وہ شدید گرمی اور ممکنہ آندھی/ژالہ باری سے بچاؤ کے لیے حفاظتی تدابیر اختیار کریں۔
