کیا موسمیاتی تبدیلی 2025 میں انسانیت کے لیے آخری وارننگ ہے؟

موسمیاتی تبدیلی 2025 عالمی درجہ حرارت، ریکارڈ گرمی اور بگڑتے موسمی نظام کے ساتھ انسانیت کے لیے ایک فیصلہ کن امتحان بن چکی ہے۔

فروزاں رپورٹ

دنیا اس وقت جس دوراہے پر کھڑی ہے، وہ محض موسمیاتی نہیں بلکہ تہذیبی اور اخلاقی بحران کا مظہر بھی ہے۔ سال 2025 عالمی میڈیا، سائنسی اداروں اور اقوامِ متحدہ کے لیے ایک غیر معمولی سال رہا ہے۔

تازہ ترین عالمی سائنسی ڈیٹا کے مطابق یہ سال انسانی تاریخ کے سب سے زیادہ گرم سالوں میں شامل ہونے جا رہا ہے۔

یہ حقیقت محض درجہ حرارت کے ریکارڈ تک محدود نہیں بلکہ ایک ایسے سلسلہ وار بحران کی علامت ہے جس کے اثرات زمین، انسان، معیشت اور سیاست سب پر مرتب ہو رہے ہیں۔

ریکارڈ توڑ گرمی: اعداد و شمار کی زبان میں بحران

یورپ کے کوپرنیکس کلائمیٹ چینج سروس سمیت کئی عالمی اداروں کے مطابق 2025 کا شمار دوسرے یا تیسرے گرم ترین سال کے طور پر تقریباً یقینی ہو چکا ہے۔

گزشتہ ایک دہائی کو تاریخ کی سب سے گرم دہائی قرار دیا جا چکا ہے، جبکہ ہر نیا سال پچھلے تمام ریکارڈ توڑنے کے قریب نظر آتا ہے۔

درجہ حرارت میں تیزی سے ہونے والااضافہ کسی قدرتی چکر کا حصہ نہیں بلکہ صنعتی سرگرمیوں، فوسل فیول کے بے دریغ استعمال، جنگلات کی کٹائی اور صارفیت پر مبنی معیشت کا براہِ راست نتیجہ ہے۔

سائنسی ماہرین واضح طور پر کہتے ہیں کہ اگر یہ اضافہ قدرتی عوامل کے تحت ہوتا تو اس کی رفتار کہیں زیادہ سست ہوتی۔

1.5 ڈگری سینٹی گریڈ: ایک سرخ لکیر

سن2015 میں طے پانے والے پیرس معاہدے میں دنیا نے اس بات پر اتفاق کیا تھا کہ عالمی درجہ حرارت کو صنعتی دور سے پہلے کی سطح کے مقابلے میں 1.5 ڈگری سینٹی گریڈ سے نیچے رکھنے کی کوشش کی جائے گی۔

اس ہدف کو سائنس دان ایک ”محفوظ حد” قرار دیتے ہیں، یہ سرخ لکیر عبور کرنے کے بعد عالمی موسمیاتی نظام ناقابلِ واپسی تبدیلیوں کی طرف بڑھ سکتا ہے۔

تاہم حالیہ مہینوں میں کئی بار عالمی درجہ حرارت اس حد کو عارضی طور پر عبور کر چکا ہے۔

ماہرین خبردار کر رہے ہیں کہ اگر موجودہ رفتار برقرار رہی تو یہ عارضی تجاوز مستقل حقیقت میں بدل سکتا ہے، جس کے نتائج نہایت خطرناک ہوں گے۔

گرم ہوتے سمندر اور بگڑتا موسمی نظام

موسمیاتی بحران کی ایک اور بڑی علامت دنیا کے سمندروں کا غیر معمولی حد تک گرم ہونا ہے۔ سمندر زمین کے درجہ حرارت کو متوازن رکھنے میں بنیادی کردار ادا کرتے ہیں اور اضافی حرارت کا بڑا حصہ جذب کرتے ہیں۔

مگر اب یہی سمندر اس حد تک گرم ہو چکے ہیں کہ وہ موسمیاتی نظام کو مزید غیر مستحکم بنا رہے ہیں۔حالیہ سائنسی تحقیقات کے مطابق بحرِ ہند اور بحرالکاہل میں درجہ حرارت میں اضافے نے ایشیا کے کئی ممالک میں شدید بارشوں، طاقتور طوفانوں اور تباہ کن سیلابوں کو جنم دیا ہے۔

سری لنکا، انڈونیشیا، تھائی لینڈ، ملائیشیا اور ویت نام میں ہونے والی حالیہ تباہیاں اس کی واضح مثال ہیں۔

ماہرین اس بات پر متفق ہیں کہ اگر سمندر معمول کے درجہ حرارت پر ہوتے تو یہ بارشیں اتنی شدید نہ ہوتیں۔

یوں یہ واقعات قدرتی آفات نہیں بلکہ موسمیاتی تبدیلی سے جڑی انسانی آفات بن چکے ہیں۔

یورپی یونین کا فیصلہ: عالمی سیاست میں ایک اہم موڑ

اسی پس منظر میں یورپی یونین کا حالیہ اعلان عالمی میڈیا میں غیر معمولی اہمیت اختیار کر گیا۔

یورپی یونین نے 2040 تک گرین ہاؤس گیسوں کے اخراج میں 90 فیصد کمی کا ہدف مقرر کیا ہے، جو 1990 کی سطح کے مقابلے میں ناپا جائے گا۔

یہ فیصلہ محض ایک ماحولیاتی اقدام نہیں بلکہ ایک سیاسی اور معاشی پیغام بھی ہے کہ مستقبل کی معیشت کم کاربن اور ماحول دوست ہو گی۔

اگرچہ اس فیصلے کو ماہرین نے سراہا ہے، مگر ساتھ ہی یہ سوال بھی اٹھایا جا رہا ہے کہ کیا باقی دنیا، خاص طور پر آلودگی پھیلانے والے بڑے ممالک، اس سمت میں عملی قدم اٹھائیں گے؟

اقوامِ متحدہ کی وارننگ: وقت تیزی سے ختم ہو رہا ہے

اقوامِ متحدہ کے ماحولیاتی پروگرام (یو این ای پی) کی تازہ رپورٹ اس بات کی تصدیق کرتی ہے کہ دنیا کے پاس وقت بہت کم رہ گیا ہے۔

اب یہ صورتحال صرف ماحولیاتی نہیں رہی بلکہ انسانی حقوق، عالمی امن اور سماجی استحکام کا بھی مسئلہ بن چکی ہے۔

ترقی پذیر ممالک: بحران کے سب سے بڑے متاثرین

موسمیاتی تبدیلی کی ایک تلخ حقیقت یہ ہے کہ اس کے اثرات سب سے زیادہ ان ممالک پر پڑ رہے ہیں جن کا عالمی آلودگی میں کردار نہایت محدود ہے۔

پاکستان، بنگلہ دیش، نیپال اور افریقی ممالک اس کی نمایاں مثالیں ہیں۔پاکستان گزشتہ چند برسوں سے شدید گرمی کی لہروں، غیر متوقع مون سون بارشوں، سیلابوں اور گلیشیئرز کے تیز رفتار پگھلاؤ کا سامنا کر رہاہے۔

سن2022 کے تباہ کن سیلاب نے واضح کر دیا تھا کہ موسمیاتی بحران مستقبل کا نہیں بلکہ حال کا مسئلہ ہے۔

شہری نظام اور موسمیاتی ناکامی

کراچی جیسے بڑے شہر موسمیاتی تبدیلی کے اثرات کا سب سے کمزور محاذ بن چکے ہیں۔ ناقص انفرا اسٹرکچر، نالوں پر قبضے، کنکریٹ کی بھرمار اور منصوبہ بندی کی کمی نے ہر بارش کو شہری آفت میں تبدیل کر دیا ہے۔
عالمی میڈیا میں زیرِ بحث موسمیاتی اسٹوریز ہمیں یہ سوچنے پر مجبور کرتی ہیں کہ اگر دنیا کا رخ نہ بدلا تو شہری زندگی خود ایک مستقل خطرہ بن جائے گی۔

کوپ کانفرنسز: امید یا تاخیر؟

ہر سال ہونے والی عالمی موسمیاتی کانفرنسیں (کوپ) ایک امید کے طور پر دیکھی جاتی ہیں، مگر ناقدین کے مطابق یہ کانفرنسیں اکثر وعدوں اور بیانات تک محدود رہ جاتی ہیں۔ کوپ30 سے بھی دنیا کو بڑی توقعات وابستہ تھیں، مگر اصل امتحان کوپ میں کیے گئے وعدوں پر عمل درآمد کرنے سے ہی ہو گا جس کے امکانات ہمیشہ کی طرح کم ہی نظر آتے ہیں۔

فیصلہ کن دہائی

سن2020 سے 2030 تک کی دہائی کو سائنس دان فیصلہ کن دہائی قرار دے رہے ہیں۔ اگر اس عرصے میں عالمی اخراج میں نمایاں کمی نہ کی گئی تو موسمیاتی نظام ایک ایسے مرحلے میں داخل ہو سکتا ہے جہاں سے واپسی ممکن نہ ہو گی۔

یہ بھی پڑھیں

بالائی ہنزہ میں سیزن کی پہلی ہمالیائی آئی بیکس بیکس ٹرافی ہنٹنگ

!کراچی میں کلائمیٹ مارچ 2025: جینے دو

یہ بحران ہمیں سکھاتا ہے کہ ماحولیات محض ایک شعبہ نہیں بلکہ اب یہ ہر پالیسی کی بنیاد ہے،ترقی کا مطلب فطرت کی قربانی نہیں اور ہم سب کی بقا اجتماعی فیصلوں سے جڑی ہے۔

آخر میں سوال یہ نہیں کہ زمین بچائی جائے یا نہیں، بلکہ اصل سوال یہ ہے کہ کیا انسان اپنے طرزِ فکر کو بدلنے کے لیے تیار ہے؟اگر جواب ہاں میں نہ آیا تو آنے والی نسلیں ہمیں تاریخ کے کٹہرے میں کھڑا دیکھیں گی۔